- Med denne avtalen sikrar vi at togtilbodet blir styrkt i dei neste fire åra. Det blir fleire avgangar, auka setekapasitet og betre standard for dei reisande. Persontransport med tog er viktig mange stader i landet, både av omsyn til miljøet og for å sikre dei reisende eit godt og effektivt tilbod. Regjeringa ønskjer at toget skal styrkjast i konkurransen med andre transportformer, og i den nye avtalen med NSB blir togtilbodet betre, særleg på strekningar der toget har sine største fortrinn.

Dette seier samferdselsminister Liv Signe Navarsete, i samband at Samferdselsdepartementet og NSB AS har underteikna ein ny rammeavtale om statleg kjøp av persontransporttenester med tog. Avtalen gjeld for perioden frå 1. januar 2007 til 31. desember 2010, og har ein samla verdi på vel 6,1 milliardar kroner for heile avtaleperioden. Utgiftene til statleg kjøp av persontransporttenester med tog skal dekkjast ved løyvingar over statsbudsjettet.

Føresetnaden om ein vesentleg vekst i det samla rutetilbodet bygger på at inga rutestrekning skal få reduksjon i dagens rutetilbod. Setekapasiteten skal oppretthaldast eller aukast på alle strekningar. Det utvida rutetilbodet og den auka setekapasitet føreset at NSB har tilstrekkjelege ressursar både når det gjeld kvalifisert arbeidskraft og materiell.

- Det har vore ein kraftig auke i utgiftene til statleg kjøp av togtransporttenester i dei siste åra. Regjeringa er opptekne av at ressursane i samfunnet skal utnyttast på ein effektiv måte. Eg er difor svært glad for at vi har kome fram til ei avtale som inneber ein gradvis auke av rutetilbodet til NSB på heile 15 prosent innanfor kjøpsordninga. Utfordringa no er at NSB klarer å få tak i naudsynt personell og materiell, sier samferdselsminister Liv Signe Navarsete.

For at toget skal styrkjast i konkurransen med andre transportformer har Samferdselsdepartementet i avtalen lagt vekt på at toget skal vere med på å binde regionar saman og gje gode kollektivløysingar i den enkelte region. I avtalen er det slått fast at NSB skal ha regionale program som gjer at selskapet gjennom si verksemd skal vere til stades på lokalt plan og at NSB skal delta aktivt i utviklinga av den enkelte region.

- NSB skal ha eit aktivt samarbeid med regionale styresmakter for å utvikle eit best mogleg samanhengjande regionalt kollektivtilbod, seier samferdselsminister Liv Signe Navarsete.

For meir informasjon, sjå:

Avtale om utførelse av persontransport med tog – "Trafikkavtalen", signert 22.01.07 (pdf)
Vedlegg A: Ruteproduksjon (pdf)
Vedlegg B: Rapportering (pdf)
Vedlegg C: Takster (pdf)
Vedlegg D: Beregning av pristilbud (pdf)
Vedlegg E: Mal for årlig kjøpsavtale (pdf)
Vedlegg F: Avtalte vederlag for de enkelte år (pdf)
Vedlegg G: Prosedyrer for beregning av ytelsesavhengig vederlag (pdf)
Vedlegg H: Prosedyrer for fastsettelse av årsaker til innstillinger (pdf)

Avtale om utførelse av persontransport med tog år 2007 - "Kjøpsavtalen", signert 22.01.07 (pdf)