Post 30 Nyanlegg og større vedlikehald

Ved behandlinga av Prop. 118 S (2013–2014) og Innst. 311 S (2013–2014) blei det løyvd 10 mill. kr til tiltak under Kystverket som kompensasjon for auka arbeidsgivaravgift i Nordland, Troms og Finnmark. Denne løyvinga blir foreslått ført på ein eigen post, og løyvinga på post 30 Nyanlegg og større vedlikehald, blir foreslått redusert med 10 mill. kr, jf. omtale under kap. 1360, post 34 Kompensasjon for auka arbeidsgivaravgift.

Post 34 Kompensasjon for auka arbeidsgivaravgift (ny)

I Prop. 118 (2013–2014) Endringer i statsbudsjettet 2014 (endring av den differensierte arbeidsgiveravgiften og kompenserendetiltak) blei det foreslått å løyve 10 mill. kr på kap. 1360 Kystverket, post 30 Nyanlegg og større vedlikehald, til tiltak under Kystverket som kompensasjon for auka arbeidsgivaravgift i Nordland, Troms og Finnmark, jf. Innst. 311 S (2013–2014). For 2015 er det i Prop. 1 S (2014–2015) foreslått å føre kompensasjonen på ein eigen post.

For å få betre oversikt over bruken av alle løyvingane som blir gitte som kompensasjon for auka arbeidsgivaravgift, foreslår departementet å opprette ein ny post 34 Kompensasjon for auka arbeidsgivaravgift, på kap. 1360 Kystverket.

Departementet foreslår derfor å løyve 10 mill. kr på kap. 1360 Kystverket, post 34 Kompensasjon for auka arbeidsgivaravgift, jf. også kap. 1360, post 30 Nyanlegg og større vedlikehald.

Post 74 Sektoravgifter Kystverket

I samband med lønnsoppgjeret 2014 blei Kystverket tildelt m.a. 12,545 mill. kr over kap. 1360, post 01 Driftsutgifter. Delar av Kystverkets verksemd som inngår i utgiftene på kap. 1360, post 01 Driftsutgifter, er avgiftsfinansiert. Kap. 5577, post 74. må derfor aukast tilsvarande. Departementet foreslår å auke løyvinga på kap. 5577, post 74 Sektoravgifter Kystverket, med 12,545 mill. kr.