1 Føremål og hovudoversikt

1.1 Føremål

I denne proposisjonen legg regjeringa fram forslag om endringar i løyvingar i forsvarsbudsjettet for 2012. Siktemålet er å skape best mogleg samsvar mellom løyvingane under dei einskilde kapitla og postane, og endringar i budsjettføresetnadene som har skjedd sidan forsvarsbudsjettet for 2012 vart vedteke.

På grunn av den komplekse samansetjinga av kapitla, med svært variable storleikar, er omgrupperingsproposisjonen eit naudsynt verkty for å sikre god økonomistyring i forsvarssektoren. Tiltak for å møte endringar i føresetnadene som oppstår i gjennomføringsåret, vert såleis handsama samla og formalisert på rett måte. Regjeringa er oppteken av å halde omfanget av omgrupperingane på eit så lågt nivå som mogleg, samstundes som kravet om realistisk budsjettering vert ivaretatt.

Omgrupperingsproposisjonen for 2012 tek føre seg budsjettekniske endringar. I tillegg vert meirinntekter for 2012 føreslått formaliserte, samt at regjeringa føreslår ei tilleggsløyving. Totalt utgjer omgrupperinga ein auke i løyvinga til Forsvarsdepartementet på 230,923 mill. kroner. I tillegg føreslår regjeringa å auke enkelte bestillingsfullmakter, samt å halde tilbake midlar på posten frå føremål omtala i Prop. 1 S (2011–2012) under kapittel 1760, post 45. Desse midlane vil verte omdisponerte til kampflyinvesteringar for etterfølgjande år.

1.2 Tilleggsløyvingar

I etterkant av den tragiske flyulykka med eit C-130J militært transportfly er Forsvaret påført ekstraordinære meirutgifter knytte til søk og kommisjonsarbeid. Registrerte meirutgifter er lønskostnader, materiellutgifter, forbruksmateriell, reise, transport og overnattingsutgifter for personell. Forsvarsbudsjettet for 2012 er difor føreslått auka med 18,938 mill. kroner for å dekkje dei ekstraordinære kostnadane.

1.3 Grunnlaget for omgrupperinga

1.3.1 Økonomisk grunnlag

Grunnlaget for omgrupperinga er vedteke budsjett for 2012, midlar førte over frå 2011 og dei seinare endringane gjort av Stortinget. Det er òg teke omsyn til forsvarssektoren sin del av lønskompensasjonen for 2012.

1.3.2 Inntekter i 2012

I høve til saldert budsjett for 2012, med dei seinare endringane gjort av Stortinget, vert det ei meirinntekt på 230,768 mill. kroner der 226,338 mill. kroner vert føreslått lagt til utgiftssida. Det vert i denne samanhengen vist til Forsvarsdepartementet si meirinntektsfullmakt i Prop. 1 S (2011–2012) under romartalsvedtak II.

1.3.3 Løyvingsbehov

Tala i tabellane nedanfor syner løyvingsbehov knytt til omgrupperinga for 2012.

På bakgrunn av dette føreslår regjeringa under forslag til vedtak, at utgiftsramma vert auka med 230,923 mill. kroner, og at inntektsramma vert auka med 230,768 mill. kroner.