2 Utval av inntekter og utgifter

2.1 Skattar og avgifter frå Fastlands-Noreg

Statsrekneskapen for 1999 viser at samla skattar og avgifter frå Fastlands-Noreg utgjorde 379,7 mrd. kroner, som er om lag 2,1 mrd. kroner høgare enn i vedteke budsjett for 1999, og om lag 3,7 mrd. kroner høgare enn lagt til grunn i nysaldert budsjett for 1999.

Tabell 2.1 viser at dei samla skatte- og avgiftsinntektene i statsrekneskapen har auka frå 357,4 mrd. kroner i 1998 til 379,7 mrd. kroner i 1999, ein auke på 22,3 mrd. kroner eller 6,2 pst. På grunn av mindre auke i den økonomiske aktiviteten og i sysselsettinga, har auken i skatte- og avgiftsinntektene vorte avdempa i høve til åra før. I perioden 1996-1998 steig dei samla skatte- og avgiftsinntektene med vel 9 pst. i årleg gjennomsnitt.

Skattar på formue og inntekt utgjorde 88,7 mrd. kroner i 1999, ein auke på 9,3 pst. eller 7,5 mrd. kroner frå året før. Skattar og avgifter til folketrygda, trygdeavgift og arbeidsgjevaravgift, utgjorde 115,6 mrd. kroner i 1999, og svarar til ein auke på 7,7 pst. frå året før.

Inntektene frå meirverdi- og investeringsavgifta utgjer ei av dei viktigaste inntektskjeldene til staten og steig med 3,1 pst. til 114,1 mrd. kroner i 1999. Andre særavgifter og tollinntekter utgjorde til saman 61,4 mrd. kroner i 1999, som svarar til ein auke på 5,2 pst. frå 1998.

2.2 Skattar og avgifter frå petroleumsverksemda

Dei samla innbetalte skattane og avgiftene frå petroleumsverksemda i 1999, utanom CO2 avgifta, vart i nysalderingsproposisjonen rekna til 15 850 mill. kroner. Det tilsvarande rekneskapstalet for 1999 er 15 475 mill. kroner. Rekneskapstala for betalte direkte skattar vart 309 mill. kroner lågare enn forventa i nysalderingsproposisjonen, medan betalt produksjonsavgift vart 22 mill. kroner høgare enn forventa. Betalt arealavgift vart 89 mill. kroner lågare enn forventa. Avviket skuldast mellom anna fråfall og tilbakelevering av areal, og for sein innbetaling av avgift. Tala i nysalderingsproposisjonen var utarbeidd på grunnlag av innbetalingane dei ni fyrste månadene av 1999 og forventa innbetalingar dei tre siste månadene.

Inntektene frå avgift på utslepp av CO2 i petroleumsverksemda var i nysalderingsproposisjonen rekna til 3 260 mill. kroner. Rekneskapstalet for 1999 er 3 261 mill. kroner.

2.3 Inntekter frå Statens direkte deltaking i petroleumsverksemda

Inntektene frå Statens direkte deltaking i petroleumsverksemda er i det alt vesentlege driftsinntekter med frådrag for driftsutgifter, og vart i nysalderingsproposisjonen rekna til 55 435 mill. kroner. Det tilsvarande rekneskapstalet for 1999 er 56 718 mill. kroner.

2.4 Totaloversikt over utgiftene

Tabell 2.2 gjev eit oversyn over utviklinga av dei samla utgiftene under dei enkelte departementa for åra 1995 –1999. Det har vore endring i strukturen på departementa i perioden, slik at tala ikkje kan samanliknast direkte.

Løyvingsrekneskapen for 1999 viser at dei totale utgiftene har vore 602,6 mrd. kroner mot 597,2 mrd. løyvd i nysaldert budsjett. Dette gjev ei meirutgift på 5,4 mrd. kroner.