1 Innleiing

Samferdselsdepartementet legg i denne proposisjonen fram ein del saker under programkategoriane 21.20 Luftfartsformål, 21.30 Vegformål, 21.50 Jernbaneformål, 21.60 Samferdselsberedskap og 22.10 Post- og telekommunikasjonar.

Proposisjonen gjeld følgjande saker:

Under 21.20 Luftfartsformål:

• Departementet gjer framlegg om å auke løyvinga på kap. 1310, post 70 Godtgjersle for innanlandske flyruter, med 10,4 mill. kr som følgje av omlegging av fiskalavgifta og nullsats på moms.

• Som følgje av terroraksjonane i USA 11.09.2001 har det blitt sett i verk ekstra tryggingstiltak ved alle norske lufthamner, og det blir derfor gjort framlegg om å redusere overskottskravet til Luftfartsverket for 2001 med 10 mill. kr.

• Det blir orientert om statleg forsikringsansvar for norske luftfartøy og lufthamner ved skader på tredjepart, som følgje av krigs- og terrorhandlingar.

Under 21.30 Vegformål:

• Det blir gjort greie for auka låneramme for Ev 18 Aust-Agderpakken.

Under 21.50 Jernbaneformål:

• På bakgrunn av at det må gjerast korreksjonar i rekneskapen til Jernbaneverket, gjer departementet framlegg om å auke løyvinga på kap. 1350, post 23 Drift og vedlikehald, med 52,9 mill. kr.

• Departementet tilrår at Stortinget gjer vedtak om at jernbanenettet mellom Leira og Dokka på Valdresbanen kan bli frigitt til andre føremål og at skjener og sviller på strekninga Bjørgo-Leira blir fjerna.

Under 21.60 Samferdselsberedskap:

• Samferdselsdepartementet gjer framlegg om å redusere kap. 1360, post 01 Driftsutgifter, med 2 mill. kr mot tilsvarande auke av kap. 1380, post 01 Driftsutgifter, på grunn av at Post- og teletilsynet skal ha eit særskild ansvar for teletryggleik og teleberedskap.

Under 22.10 Post- og telekommunikasjonar:

• Det blir orientert om statleg garanti til konkursbuet for Enitel AS.