Eigenkapital til Flytoget AS

Ved handsaminga av St.prp. nr. 1 Tillegg nr. 2/Budsjett-innst. S. nr. 13 Tillegg nr. 3 (2002-2003) vedtok Stortinget å overføre eigarskapet til Flytoget AS frå NSB AS til staten ved Samferdselsdepartementet frå og med 1. januar 2003. Ein konsekvens av overføringa var at selskapet måtte refinansiere i den private lånemarknaden dei låna det hadde i NSB-konsernet. Det viste seg at selskapet fekk store vanskar med å refinansiere låna sine. Berre Den Norske Bank ASA (DnB) var villig til å inngå ei låneavtale med selskapet. På grunn av den låge eigenkapitalen i selskapet var DnB likevel ikkje villig til å inngå ei langsiktig låneavtale med selskapet.

Flytoget underteikna 23. desember 2002 ei kortsiktig låneavtale med DnB på eitt år på til saman 950 mill. kr. DnB stilte som eit krav for å forlengje låneavtala ut over eitt år at selskapet fekk auka sin eigenkapital med 250 mill. kr i 2003. Utan den kortsiktige låneavtala ville selskapet ikkje ha vore betalingsfør. På denne bakgrunn søkte styret i Flytoget Samferdselsdepartementet om auka eigenkapital på 250 mill. kr saman med eit ansvarleg lån på 145 mill. kr.

Flytoget sine sonderingar i lånemarknaden dette året viser at bankane framleis ikkje er villige til å yte lån til selskapet utan at det blir gjort noko med den finansielle situasjonen i selskapet. I 2002 hadde Flytoget eit driftsresultat før avskrivingar på 86 mill. kr og ein negativ kontantstraum frå drifta på 19 mill. kr. I følgje bankane er dette ikkje godt nok i forhold til eit lån på 950 mill. kr.

Det er viktig å leggje tilhøva til rette slik at Flytoget kan få på plass ei langsiktig finansieringsløysing med ein tilfredsstillande eigenkapital. Forslaget om meirverdiavgift på persontransport med 6 pst. utgåande avgift, at el-avgifta blir teken bort og den positive utviklinga i rentemarknaden, vil medverke positivt til Flytoget sitt driftsresultat i åra som kjem. Dette har likevel liten verknad på den finansielle situasjonen i selskapet på kort sikt og behovet for auka eigenkapital. Regjeringa legg derfor opp til at selskapet får tilført ny eigenkapital frå staten med 300 mill. kr. Auka eigenkapital gjer det mogleg for Flytoget å kunne forlengje/refinansiere låna sine.

Eigenkapitaltilføringa vil bli følgd opp ved krav til marknadsmessig avkasting på eigenkapitalen i selskapet. Nytt reknestykke med utgangspunkt i Flytoget sin langtidsplan for 2003-2007 viser at selskapet vil kunne få overskot i 2005, og at avkastinga på eigenkapitalen vil kunne bli tilfredsstillande i løpet av fem år.

Regjeringa går ikkje inn for å godta søknaden om eit ansvarleg lån på 145 mill. kr, då det er viktig å halde fast på prinsippet om at Flytoget skal ta opp låna sine i den private lånemarknaden. Dette vil gi ei tett oppfølging frå lånegivar og auka kapitaldisiplin i selskapet. Det er også av betyding at ei kapitaltilføring ikkje blir av ein slik storleik at ho svekkjer fokuset selskapet skal ha på kostnadseffektiv drift.

På denne bakgrunn foreslår Samferdselsdepartementet å løyve 300 mill. kr på nytt kap. 1352 Flytoget AS, post 96 Eigenkapital.

Omdanning av BaneService i Jernbaneverket til aksjeselskap - oppretting av interimselskap

Jernbaneverket har organisert det tyngre vedlikehaldet og anleggsverksemda knytt til sporarbeid i den interne forretningsverksemda BaneService. BaneService blei oppretta i 1992 og har konkurranse frå private entreprenørar. For å sikre mest mogleg like konkurransevilkår og for å leggje tilhøva til rette for arbeidet med effektivisering av Jernbaneverket, foreslår Regjeringa at det blir arbeidd med å omdanne BaneService til eit statleg eigd aksjeselskap. Regjeringa tek sikte på å omdanne BaneService til aksjeselskap 1. juli 2004. Det vil også bli arbeidd med sikte på å selje verksemda på eit seinare tidspunkt.

I første omgang foreslår Samferdselsdepartementet å opprette eit interimselskap med ein aksjekapital på 100 000 kr. Selskapet skal ikkje ha tilsette eller andre eigedelar. Formålet med eit interimselskap er å leggje tilhøva til rette for at omdanninga kan gjerast enklare, og at selskapet etter omdanninga blir operativt frå første dag. Styret for interimselskapet skal lage ein strategiplan for selskapet som kan leggjast til grunn for BaneService som aksjeselskap. Det vil vere behov for midlar til å dekkje utgifter i interimsperioden t.d. godtgjersler av ymse slag og konsulentutgifter. Samferdselsdepartementet kan ikkje no talfeste desse utgiftene og foreslår derfor at departementet får fullmakt til å utgiftsføre driftsutgifter for interimselskapet på nytt kap. 1355 BaneService, post 70 Tilskot til drift, mot tilsvarande innsparing under kap. 1350, post 23 Drift og vedlikehald. Dei faktiske utgiftene vil departementet kome tilbake til i samband med forslag om å omdanne BaneService til aksjeselskap, eller seinast i samband med Revidert nasjonalbudsjett 2004. Departementet foreslår også å løyve 100 000 kr i eigenkapital til interimselskapet på kap. 1355, post 96 Eigenkapital.