1 Innleiing

Samferdselsdepartementet legg i denne proposisjonen fram ein del saker under programkategoriane 21.20 Luftfartsformål, 21.30 Vegformål, 21.50 Jernbaneformål og 22.10 Post og telekommunikasjonar.

Proposisjonen gjeld desse sakene:

Under 21.20 Luftfartsformål:

• Samferdselsdepartementet orienterer om status for kompetansesenteret for flygarutdanning.

Under 21.30 Vegformål:

• I samband med sluttføring av Trondheimspakka med m.a. E6 Nordre avlastingsveg, foreslår departementet å utvide bompengeinnkrevjinga for hovudvegutbygginga i Trondheimområdet.

• Departementet legg fram forslag om delvis bompengefinansiert utbygging av prosjekt og tiltak på rv 45 i Gjesdal kommune, Rogaland.

• Det blir gjort greie for arbeidet med planlegging og finansiering av utbygging av E18 Mosseveien i tunnel.

• For utbygging av E18 Østfold gjer departementet greie for vegstandard, planstatus, kostnader og høvet til gjeldande Østfoldpakke og tilrår anleggsstart på parsellen E18 Sekkelsten - Krosby i 2003.

• Det blir orientert om arbeidet med E10 Fastlandsforbindelse til Lofoten (LOFAST).

• Departementet orienterer om anleggsstart for utvidinga av motorvegbrua på E18 over Drammenselva.

• Det blir orientert om arbeidet med Eiksundsambandet.

• Samferdselsdepartementet orienterer om tidsplan for omklassifisering av stamvegnettet.

• Departementet legg fram forslag til prinsipp for alternativ bruk av ferjetilskot.

• På bakgrunn av Stortingets oppmodingsvedtak nr. 390 av 13. juni 2000 gjer departementet greie for ulike tiltak når det gjeld køyring påverka av andre rusmiddel enn alkohol i vegtrafikken.

Under 21.50 Jernbaneformål:

• Departementet orienterer om ny framdriftsplan for konkurranseutsetjing innan jernbanen.

Under 22.10 Post og telekommunikasjonar:

• Det blir orientert om årsresultat og utbyte frå Posten Norge AS.