1 Álggaheapmi

Sámedikki dievasčoahkkin dohkkehii Sámedikki jagi 2011 jahkedieđáhusa guovvamánu 23. b. 2012. Jahkedieđáhus lea sáddejuvvon departementii sámelága § 1-3 mearrádusaid mielde, ja dál dat sáddejuvvo Stuorradiggái. Jahkedieđáhus lea mielddusin nr. 1 ja Sámedikki jagi 2011 rehketdoallu lea mielde mielddusin 2. Gieldda- ja hálddahuslávdegotti mearkkašumiid vuođul mat leat Innst. 240 S (2011–2012) nammasaš dokumeanttas, departemeanta ain áigu lágidit Sámedikki jahkedieđáhusaid Stuorradiggái jahkásaš dieđáhusas.

Sámedikki jahkedieđáhus čilge Sámedikki politihkalaš barggu, daid doaibmamušaid maid Sámediggi galgá hálddašit ja sierranas ekonomalaš ja hálddahuslaš hástalusaid.

Stuorradiggedieđáhussii leat váldojuvvon mielde departemeanttaid mearkkašumit ja árvvoštallamat muhtun áššiide maid Sámediggi lea váldán ovdan iežas jagi 2011 jahkedieđáhusas, ja mielde leat maiddái dieđut mo muhtun eará áššit sámepolitihkalaš suorggis leat ovdánan. Visogovva maid lea mielde mii čájeha mat ráđđádallamiid leat leamaš Sámedikkiin jagi 2011 ja jagi 2012 ovddit oasis.