1 Álggahus

Sámedikki dievasčoahkkin dohkkehii Sámedikki 2010 jahkedieđáhusa njukčamánu 9. beaivvi 2011. Sámelága § 1–3 mearrádusaid mielde lea jahkedieđáhus sáddejuvvon departementii. Nugo dábálaččat ge, de ovddida ráđđehus dákko bokte Sámedikki jahkedieđáhusa Stuoradiggái stuoradiggedieđáhussan (gč. Justislávdegotti mearkkašumiid sámelága dohkkehanevttohussii, Innst. O. nr. 79 (1986–87)).

Sámedikki jahkedieđáhus čilge Sámedikki politihkalaš bargguid, bargamušaid maid Sámediggi galgá hálddašit, ja iešguđetlágan ekonomalaš ja hálddahuslaš hástalusaid. Jahkedieđáhus lea biddjojuvvon dieđáhussii mielddusin, mielddus 1. Sámedikki 2010 rehketdoallu lea mielddus 2.

Sámedikki jahkedieđáhus lea muhtun jagiid leamaš oassin ráđđehusa dieđáhusas Stuoradiggái. Muhto dál dat ovdanbiddjojuvvo mielddusin, danin go dat heive buoremusat Sámedikki sorjjasmeahttunvuhtiii ráđđehusa ektui.

Stuoradiggedieđáhusas leat departemeanttaid mearkkašumit ja árvvoštallamat muhtun áššiide maid Sámediggi lea gieđahallan iežas 2010 jahkedieđáhusas, ja čuvvot maid dieđut muhtun eará áššiid ovdáneami birra sámepolitihkalaš suorggis. Dieđáhusas oaidná maid man galle geardde leamaš konsultašuvnnat Sámedikkiin 2010:s ja vuosttaš jahkebealis 2011:s.

2012 rájes árvvoštallá ráđđehus ovddidit Sámedikki jahkedieđáhusa bušeahttaproposišuvdnii mielddusin, dan sadjái go sierra stuoradiggedieđáhussan. Duogážin lea ahte Stuoradigge de beassá meannudit Sámedikki bušeahttaruđaid geavaheami ovttas eará raporttaiguin stáhtabušeahta meannudeamis. Jahkedieđáhus sáhttá meannuduvvot Stuoradikkis árabut go dál dahkko ja jahkedieđáhusa meannudeami sáhttá buohtalastit bušeahttadárbbuiguin.