2 Departemeantta árvvoštallamat

Lágas lea čujuhuvvon Romssa ja Finnmárkku fylkii, Romssa ja Finnmárkku fylkkagildii, ja Romssa ja Finnmárkku fylkkadiggái. Departemeanta evttoha rievdadit teavstta nu ahte čujuhuvvo instánssaide «Finnmárkkus». Dainna lágiin mannat ruovttoluotta dan ortnegii mii lei ovdal go Romssa ja Finnmárkku fylkkagielddat ovttastahttojuvvojedje. Stáhtahálddašeaddji dáfus árvala departemeanta ahte láhkamearrádus hábmejuvvo dainna lágiin ahte doaibmá beroškeahttá das movt iešguđetge stáhtahálddašeddjiid ámmáha geográfalaš juohku leaš.

Finnmárkkulága § 7 regulere movt Finnmárkkuopmodaga stivralahtut galget válljejuvvot. Gustovaš mearrádusa mielde válljejit Sámediggi ja Finnmárkku fylkkadiggi goabbáge golbma lahtu ja persovnnalaš várrelahtuid. Departemeanta evttoha rievdadit ruovttoluotta dasa mii lei ovdal ovttastahttima. Finnmárkku fylkkadiggi galgá válljet golbma lahtu ja persovnnalaš várrelahtuid. Evttohus mielddisbuktá ahte Romssa beali fylkkadiggepolitihkkarat eai šat leat mielde mearrideame geat Finnmárkkuopmodaga galget stivret.

Lága 15. paragráfas daddjo ahte Finnmárkkuopmodaga stivra sáhttá mearridit ahte vejolaš badjebáza sáhttá máksojuvvot Romssa ja Finnmárkku fylkkagildii, Sámediggái dahje almmolaš oktasašávkki ulbmiliidda. Departemeanta evttoha ahte mearrádus rievdaduvvo nu ahte Finnmárkku fylkkagielda sáhttá leat okta dain vejolaš vuostáiváldiin. Dán mearrádusa maŋemus cealkagis daddjo ahte badjebáza mii juhkkojuvvo Finnmárkku fylkkagildii dahje almmolaš oktasašávkki ulbmiliidda galgá leat buorrin Finnmárkku ássiide. Departemeanta evttoha ahte mearrádus rievdaduvvo ruovttoluotta nu movt lei ovdal ovttastahttima. Cealkka šaddá dalle ahte badjebáza máksojuvvo Finnmárkku fylkkagildii, Sámediggái, dahje dakkár oktasašávkki ulbmiliidda, mat bohtet fylkka ássiide buorrin.

Movt gozihanlávdegoddái válljet lahtuid boahtá ovdan 16. §:s. Departemeanta evttoha ahte dat dárkkistanlávdegoddelahttu ja su persovnnalaš várrelahttu maid Sámediggi ii vállje, dan vállje Finnmárkku fylkkadiggi. Dát vuohki šaddá nu go lei ovdal ovttastahttima.

Romssa ja Finnmárkku stáhtahálddašeaddji namuhuvvo 18. ja 46. §§:in. Dát mearrádusat nannejit ahte Romssa ja Finnmárkku stáhtahálddašeaddji galgá leat almmolašvuođalága rihkkuma váidagiid váiddaásahussan. Departemeanta evttoha ahte mearriduvvo ahte váiddaásahussan galgá leat stáhtahálddašeaddji almmá fylkka namuheami haga. Dat mearkkaša dan stáhtahálddašeaddjeámmáha mii hálddaša Finnmárkku geográfalaš guovllu.