5 Mearkkašumit láhkaevttohusa iešguđetge mearrádusaide

Dáidda paragráfaide: § 7 nubbi lađas, § 7 guđát lađas, § 10 goalmmát lađas ja § 10 guđát lađas, § 16 vuosttaš lađas, § 16 viđát lađas ja § 31 nubbi lađas.

Nu movt láhka lea dál, de leat muhtin doaimmat ja barggut biddjojuvvon Romssa ja Finnmárkku fylkkadiggái. Ovdamearkka dihte vállje fylkkadiggi golbma stivralahtu ja persovnnalaš várrelahtuid, vrd. Finnmárkkulága § 7 nuppi lađđasa. Jus stivra ii nagot soahpat gii galgá leat jođiheaddji, de daddjo § 7 guđát lađđasis ahte fylkkadiggi vállje jođiheaddji ja várrejođiheaddji leaskalohkojagiid. 10. paragráfas leat njuolggadusat meahcceeatnamiid nuppástuvvon geavaheami ja gittaopmodaga luobaheami birra. Fylkkadiggi galgá maiddái nammadit ovtta lahtu dárkkistanlávdegoddái, vrd. § 16 vuosttaš lađđasa, ja fylkkadiggi galgá maiddái vuostáiváldit dárkkistanlávdegotti raportta, vrd. § 16 viđát lađđasa. Evttohus mielddisbuktá ahte dát doaimmat biddjojuvvojit Finnmárkku fylkkadiggái.

§ 15

Finnmárkkuopmodaga doaimma ulbmil ii leat čohkket badjebáhcaga, muhto jus lea gártan badjebáza, de sáhttá stivra mearridit juohkit eret olles dahje oasi doaimma badjebáhcagis. Departemeantta evttohus mielddisbuktá ahte dát mearrádus rievdaduvvo ruovttoluotta nu movt lei ovdal ovttastahttima. Mearrádus šaddá de ahte Finnmárkkuopmodaga stivra sáhttá mearridit ahte badjebáza ollásit dahje oassálassii máksojuvvo Finnmárkku fylkkagildii, Sámediggái, dahje dakkár oktasašávkki ulbmiliidda, mat bohtet fylkka ássiide buorrin.

§ 18 ja § 46

Dáin mearrádusain boahtá ovdan guhte lea váiddaorgána váidagiid hárrái almmolašvuođalága olis. Go lágas čujuhuvvo «stáhtahálddašeaddjái», de oaivvilduvvo dat stáhtahálddašeaddjiámmát mii hálddaša Finnmárkku geográfalaš guovllu.