1 Hovudinnhaldet i proposisjonen

I proposisjonen gjer Justisdepartementet framlegg om endring av reglane i lov 20. desember 1996 nr. 106 om tomtefeste (tomtefestelova) § 37 om fastsetjing av innløysingssum ved feste av tomt til bustadhus og fritidshus. Bakgrunnen er Høgsteretts dom 21. september 2007 i Sørheimsaka (Rt. 2007 s. 1308). Fleirtalet i Høgsterett kom til at den såkalla 40-prosentregelen i tomtefestelova § 37 første ledd andre punktum etter omstenda kan føre til resultat som er i strid med Grunnlova § 105 om retten til full erstatning ved oreigning, jf. nærmare i punkt 3 og 5 nedanfor. Tomtefestelova må derfor endrast.

Framlegget går ut på at festaren skal kunne krevje innløysing til 25 gonger oppregulert festeavgift. Ved tidsavgrensa kontraktar skal bortfestaren likevel kunne krevje at innløysingssummen blir sett til 40 prosent av råtomtverdien med frådrag for verdiauke som festaren har tilført tomta (40-prosentregelen).