1 Bakgrunn

Avgjerd i EØS-komiteen nr. 101/2000 av 10. november 2000 gjeld endring av protokoll 31 til EØS-avtala om samarbeid på særlege område utanfor dei fire fridomane. Endringa inneber at EFTA-statane får vera med i framhaldet av det fleirårige fellesskapsprogrammet for fremming av fornybare energikjelder i Fellesskapet (ALTENER). ALTENER vart endra ved rådsvedtak 2000/646/EF av 28. februar 2000. Endringa inneber ny komité- og styringsstruktur for ALTENER. Såleis er ALTENER no eitt av seks delprogram under rammeprogrammet for tiltak innanfor energisektoren (vedteke ved rådsvedtak 1999/21/EF/Euratom). I tillegg til ALTENER innheld rammeprogrammet ETAP (studiar, marknadsanalysar og prognosar), SYNERGI (internasjonalt samarbeid), SAVE (energieffektivisering), CARNOT (kolteknologi) og SURE (tryggleik i samband ved kjernefysisk energi). For perioden 1998-2002 har rammeprogrammet ei budsjettramme på 170 millionar euro. Til ALTENER er det sett av 77 millioner euro.

I og med at deltaking i programmet inneber økonomiske plikter for Noreg, er det naudsynt med samtykke frå Stortinget til å godkjenne EØS-komitéavgjerda.

Avgjerda i EØS-komiteen og rådsvedtaket følgjer i uoffisiell norsk versjon som trykte vedlegg til denne proposisjonen.