Sosial- og helsedepartementet gjer med dette framlegg om auke av løyvingane for 1999 under kap 2711 post 70 Refusjon spesialisthjelp og post 71 Refusjon psykologhjelp, under kap 2755 post 61 Tilskot til fastlønsordning allmennlegar, post 62 Tilskot til fastlønsordning fysioterapeutar, post 70 Refusjon allmennlegehjelp og post 71 Refusjon fysioterapi og under kap 739 post 61 Tilskot til driftsavtalar. Auken på i alt 116,0 mill kroner har samanheng med reviderte avtalar med Den norske lægeforening, Norske Fysioterapeuters Forbund og Norsk Psykologforening om takstar og driftstilskot. Det er sett av reservar til dekking av meirutgiftene ved oppgjeret under kap 2309 Tilfeldige utgifter (Ymseposten). Denne løyvinga vil det seinare bli gjort framlegg om å setje ned.

Det blir òg gjort framlegg om auke av løyvinga for 1999 under kap 731 Rikshospitalet post 50 Statstilskot med 13,0 mill kroner. Auken har samanheng med avtale mellom staten og Cerebral Parese-foreningen om husleige for statens bruk av Berg Gård i perioden 1. januar 1996 - 31. desember 1998.