4 Opptaket hausten 1998

4.1 Venta kapasitet

I dette kapitlet viser vi kor stor den totale opptakskapasiteten innan høgre utdanning er. Vi prøver óg å vise kor stor den totale opptakskapasiteten er ved dei allmennvitskaplege fakulteta ved universiteta.

For å finne ut kor stor den totale opptakskapasiteten i heile universitets- og høgskolesektoren er kvart studieår, har departementet nytta ein kalkulert storleik for opptakskapasiteten ved universitet og høgskolar basert på eit estimert tal for uteksaminering av studentar, trekt frå kutt i studieplassar og lagt til nye. Nedanfor følgjer ei oversikt over utviklinga i opptakskapasiteten i sektoren i perioden frå 1993 til 1998 (Tabell 4.1).

I den berekna opptakskapasiteten for 1998 er det, med unntak for Bergen, lagt inn vidareføring av dei 1648 studieplassane som vart oppretta i 1997, kuttet i studieplassar ved dei allmennvitskaplege fakulteta og opprettinga av nye studieplassar på medisin og psykologi i St prp nr. 1 (1997-98) og opprettinga av nye studieplassar på ulike profesjonsstudium i samband med Handlingsplan for helse- og omsorgspersonell. I tillegg er det tatt omsyn til dei studieplassane som vart oppretta innan psykologi og IT-fag etter framlegg i St prp nr 1 Tillegg nr. 3 (1997-98). For Universitetet i Bergen bruker vi dei tala for opptakskapasitet som universitetsdirektøren la fram for styret ved handsaminga av saka. På grunn av stort fråfall frå studia, må dei ha eit så stort opptak for å oppfylle måltala i St prp nr 1.

Vi gjer merksam på at tala i tabellen kan vere usikre. I denne tabellen har vi ikkje hatt høve til å justere for avgang og permisjonar i løpet av siste studieår. På grunn av stor avgang i løpet av studiet, har ikkje kuttet på 2000 studieplassar gitt tilsvarande kutt i opptakskapasitet. I tillegg til det som står i tabell 4.3, er det foreslått ei auke på 310 studieplassar innan IT-fag i revidert nasjonalbudsjett. Desse plassane vil ikkje bli fordelt før etter at saka er behandla i Stortinget. Dei 90 plassane på høgre grad, vil truleg bli lagt til universiteta, medan dei 220 plassane på lågare grad vil bli fordelt mellom universiteta og høgskolane.

For studieåret 1998/99 gir tilsvarande tabell følgjande tal: