5 Saemien identiteetem nænnoestidh
Saemien gaavnedimmiesijjieh goh festivaalh , gaarsjelimmieöörnedimmieh jïh noerhtelaanti sijjieh viehkiehtieh dam saemien identiteetem nænnoestehtedh .
Kultuvre, gaarsjelimmie jïh jïjtjevyljehkevoete
Kultuvre-, gaarsjelimmie- jïh jïjtjevyljehkevoetesuerkie viehkehte ektievoetem jïh goerkesadtemem sjugniedidh, jïh tjiehpiesvoeth jïh dååjrehtimmieh vadta mah maehtieh vihkeles årrodh abpe jieledem. Meatan årrodh kultuvresne, gaarsjelimmesne jïh jïjtjevyljehkevoetesne aaj viehkehte saemien identiteetem nænnoestehtedh, jïh maahta badth aaj vaarjelimmine årrodh sïerredimmien vööste.
Gaarsjelimmie nuepiem vadta saemien siebriedahkese daajroem jïh tjiehpiesvoeth vedtedh orre boelvide, jïh viehkehte saemien gïelem eevtjedh. Saemien kultuvreaerpie, tjeahpoe jïh gïele identiteetem sjugniedieh. Saemien kultuvreinstitusjovnh goh museume jïh teatere, saemien festivaaligujmie jïh kultuvreöörnedimmiejgujmie ektine, jearsoes sijjieh jïh gaavnedimmiesijjieh sjugniedieh mah jieledekvaliteetem jïh hijven healsoem eadtjoestieh.
Gaskenasjonaale laavenjostoe
Dah åejvieladtjh Soemesne, Sveerjesne jïh Nöörjesne laavenjostoem åtneme saemien gyhtjelassi bïjre 1964 raejeste, gosse Noerhtelaanti laavenjostoeåårgane saemie- jïh båatsoeburriejgyhtjelasside tseegkesovvi. Saemiedigkiepresidenth jïh ministerh mah dïedtem utnieh saemien aamhtesi åvteste Soemesne, Sveerjesne jïh Nöörjesne leah jaabnan sinsitniem gaavnedamme jaepien 2000 raejeste, jïh saemiedigkieh Soemesne, Sveerjesne jïh Nöörjesne tjåenghkies laavenjostoeåårganem tseegkeme, Saemien parlamentarihkeles raerie.
ENn bæjhkoehtimmie aalkoealmetji reaktaj bïjre (UNDRIP) nænnoestamme sjïdti ENn generaalekrirreste jaepien 2007, nöörjen åejvieladtjh jïh Saemiedigkie dïsse jååhkesjin. Dej minngemes jaepiej dle barkoem aalkeme juktie aalkoealmetji meatan årroeh nænnoestehtedh EN:sne, guktie aalkoealmetji tjirkijh institusjovnh maehtieh jïjtjeraarehke akkrediteeredamme sjïdtedh, jïh nuepieh åadtjodh såemies sijjieh gaavnedh gusnie aamhtesh gïetedieh mah dejtie doehtedieh. Nöörjen åejvieladtjh leah eadtjohkelaakan meatan orreme digkiedimmine, jïh nænnoesåbpoe meatan årrodh.