5 Sáme identitiehtav nannit

Sáme æjvvalimsaje dagu festivála , valástallamdáhpádusá ja nuorttarijkaj æjvvalimsaje nanniji sáme identitiehtav .

Kultuvrra, valástallam ja luojvoj suorgge

Kultuvrra-, valástallam- ja luojvoj suorge doarjju aktisasjvuodav ja gierddisvuodav ja bukti tjehpudagájt ja muossádimijt ma máhtti liehket ájnnasa iellema tjadá. Kultuvra, valástallama ja luojvoj suorge oassálasstem nanniji aj sáme identitiehtav, ja máhtti nuppástime vuosstij suoddjit.

Valástallama baktu bæssá sáme sebrudahka máhtudagájt ja tjehpudagájt ådå buolvajda joarkedit, ja dat aj sámegielav nanni. Sáme kultuvrraárbbe, dájdda ja giella identitiehtav hábbmiji. Sáme kultuvrrainstitusjåvnå, dagu musieja ja teáhttara, sáme festivála ja kultuvrradáhpádusá li jasska ariená ja æjvvalimsaje ma hávsskes iellemav ja buorre varresvuodav åvdedi.

Rijkajgasskasasj aktisasjbarggo

Suoma, Svieriga ja Vuona oajválattja li sáme vidjurij hárráj aktan barggat 1964 rájes, gå Nuorttarijkaj aktisasjbarggoavtadahka sáme- ja ællobargoj vidjurij hárráj ásaduváj. Suoma, Svieriga ja Vuona sámedikkepresidenta ja minisstara gudi sáme vidjurij åvdås vásstedi li jage 2000 rájes aktelt tjåhkanaddam, ja Suoma, Svieriga ja Vuona sámedikke li aktisasj aktisasjbarggoásadusáv dahkam, Sáme parlamentarijkalasj ráde.

AN:a iemeálmmugij rievtesvuodaj tjielggidis (UNDRIP) mierreduváj AN:a ållestjåhkanimes jagen 2007, vuona oajválattja ja Sámedigge dav nannusit doarjjun. Maŋemus jagijt lip barggam váj iemeálmmuga galggi buorebut gullut AN:an, váj da institusjåvnå ma iemeálmmugijt åvdåsti máhtti ietjas namán akkreditieriduvvat ja navti bessat oassálasstet daj sajijn gånnå ássje ma sidjij guosski, giehtadaláduvvi. Vuona oajválattja li vissjalit ságastallamijda sæbrram ja doarjjop iemeálmmugijt váj galggi bessat ienebut oassálasstet.