2 Nye Veier si prioritering av prosjektet

Nye Veier AS har som oppgåve å bygge ut delar av hovudvegnettet raskare og meir kostnadseffektivt og dermed gi meirverdi til samfunnet ut over utbygging i tradisjonell forstand. Selskapet arbeider heilskapleg med prosjekta frå første stund og bygger lengre samanhengande strekningar. Dette skal gi raskare og meir kostnadseffektiv utbygging. Utbyggingsrekkefølga blir vald ut frå vurderingar av samfunnsøkonomisk lønnsemd, mellom anna trafikksikkerheit og samfunnssikkerheit. Vidare tar ein omsyn til heilskapleg utbygging, modningsgraden til prosjekta og tilleggsanalysar av netto ringverknader der det er relevant.

Prioritering basert på samfunnsøkonomisk lønnsemd er nedfelt i vedtektene til selskapet. Her heiter det at: «Strekningene i selskapets samlede utbyggingsportefølje med høy samfunnsøkonomisk lønnsomhet prioriteres gjennomført foran de med lav/negativ samfunnsøkonomisk lønnsomhet».

Oppgåva til Nye Veier er å bidra til heilskapleg og samanhengande utbygging av trafikksikre riksvegar, større kostnadseffektivitet, auka samfunnsøkonomisk lønnsemd og styrking og utviding av bu- og arbeidsmarknadsregionar. Nye Veier har delt utbyggingsporteføljen i to porteføljar som skal planleggast og byggast ut på maksimalt 20 år. Samferdselsdepartementet vedtok i brev av 11. januar 2019 å overføre tre nye prosjekt til Nye Veier sin utbyggingsportefølje. Desse er E6 Øyer – Otta, E16 Kløfta – Kongsvinger og E6 Kvænangsfjellet. Desse inngår og blir prioriterte på lik linje med dei andre prosjekta i utbyggingsporteføljen til Nye Veier. Det er viktig å sikre at det også i tida framover skal vere god konkurranse mellom prosjekta i utbyggingsporteføljen til Nye Veier. Granavolden-plattforma seier at porteføljen til Nye Veier skal aukast, både i tal prosjekt og i finansiering, i samband med kommande Nasjonal transportplan. Ved at talet prosjekt i porteføljen blir auka, beheld ein konkurranseelementet som har vore viktig for å oppnå meir effektiv vegbygging.

Nye Veier AS gjennomfører porteføljeprioriteringar to gonger årleg. Heile strekninga E18 Tvedestrand – Dørdal er no prioritert for utbygging. Nye Veier AS legg opp til kontinuerleg utbygging på Sør-Austlandet. For å oppnå dette treng ein langsiktig og føreseieleg finansiering av prosjekta. Føreseieleg finansiering vil sikre at selskapet kan tilpasse seg nasjonal kapasitet i entreprenørmarknaden, og legge til rette for rasjonell framdrift i prosjekta.

Stortinget har tidlegare vedtatt bompengeproposisjon for delfinansiering med bompengar for følgande strekningar i porteføljen til Nye Veier AS: E18 Tvedestrand – Arendal, E18 Rugtvedt – Dørdal, E6 Kolomoen – Moelv, E39 Kristiansand vest – Lyngdal vest, E6 Ranheim – Åse, E6 Ulsberg – Melhus, E6 Moelv – Øyer og E18 Langangen – Dørdal.