5 Finansieringsopplegg

Finansieringa av Askøypakken for perioden 2014–2028 var basert på fylkeskommunale midlar og bompengar innanfor ei økonomisk ramme på totalt 1 330 mill. 2013-kr. Av dette var bompengebidraget føresett å utgjere 1 120 mill. kr.

Det er til saman nytta 990 mill. 2022-kr til investeringar ved utgangen av 2021. Fylkeskommunen har bidratt med 338 mill. kr inkl. kompensasjon for meirverdiavgift (mva.), og bompengebidraget er til no 652 mill. kr.

Det står att 1 013 mill. 2022-kr, der 805 mill. kr er bompengebidrag og 208 mill. kr er fylkeskommunale midlar inkl. mva-kompensasjon. Av desse er 85 mill. kr reine fylkeskommunale midlar.

I det reviderte finansieringsopplegget for Askøypakken er det lagt til grunn etablering av ein ny bomstasjon frå 2023 og forlenging av den samla bompengeinnkrevjinga i fem år til 2033. Det er berekna at det vil gi eit bompengebidrag på 489 mill. kr. Det er også lagt til grunn ytterlegare om lag 159 mill. kr i mva-kompensasjon. Saman med midlane som står att frå tidlegare gir dette ei total ramme til vegprosjekt i perioden 2022–2033 på 1 661 mill. 2022-kr. Av dette utgjer bompengebidraget 1 294 mill. kr.

Tabell 5.1 viser prosjekta som inngår i forlenga Askøypakke og kostnader for fullføring i perioden 2022–2028. Det er gjort ei oppdatering av kostnadsanslaga sommaren 2021 for dei resterande prosjekta i pakken. Prosjekta er i prioritert rekkjefølgje. I tråd med Prop. 197 S (2012–2013) skal fylkeskommunen sin eigendel i utgangspunktet vere øyremerkt finansiering av kollektivtiltak. Difor inngår ikkje kollektivtiltak i prioriteringsrekkjefølgja.

Finansieringsplanen for forlenga Askøypakke for perioden 2022–2033 er vist i tabell 5.2.

Terskelverdien for å gjennomføre ekstern kvalitetssikring (KS2) av bompengepakkar og enkelttiltak er 1 mrd. kr. Forlenginga av Askøypakken inneber innkrevjing i ytterlegare fem år og etablering av ein ny bomstasjon. Saman med auka tilbakeføring av mva-kompensasjon vil desse endringane gi eit bidrag til finansieringsplanen på om lag 648 mill. kr. Alle prosjekta har også kostnadsanslag under terskelverdien. Det er derfor ikkje gjennomført KS2.