5 Økonomiske og administrative konsekvensar

Det fleirårige EU-programmet eContent plus vil ha ei ramme på til saman 149 millionar euro i tidsrommet 2005-2008. Ved deltaking i programmet vil Noreg ha budsjettmessige plikter under heile denne programperioden.

Noreg vil, med grunnlag i artikkel 82 i EØS-avtala, plikte seg til å gje finansiell støtte til programmet som svarar til om lag 2 prosent av den samla kostnadsramma, dvs. om lag 2,98 millionar euro eller om lag 25,3 millionar kroner (rekna etter kurs 1 euro=8,5 norske kroner). I tillegg kjem Noreg sin andel av administrative kostnader, grovt rekna til om lag 840 000 euro, eller 7,14 millionar kroner. Det vil også komme på utgifter til ein nasjonal ekspert med om lag 800 000 kroner pr. år, til saman 3,2 millionar kroner i programperioden. Vidare vil nasjonal oppfølging (sekretariat) medføre utgifter på om lag 2,4 millionar kroner til. I tillegg kjem utgifter til evaluering av programdeltakinga i etterkant på om lag 1 million kroner. Totale årlege kostnader knytt til programmet utgjer om lag 9,77 millionar kroner, som vil utgjere 39,07 millionar kroner for heile programperioden. Av desse er 3,4 millionar kroner knytta til auka utgifter i Noreg.

Nærings- og handelsdepartementet har ansvaret for den norske deltakinga i programmet, og kostnadene vil verte dekte innanfor den eksisterande budsjettramma til dette departementet (kap.924, post 70) St.prp.nr.1. (2005-2006) i den aktuelle perioden.

For 2005 og 2006 kjem utgiftene til det nye eContent plus -programmet i tillegg til dekking av utgifter til avslutting av det eksisterande eContent-programmet.