14 Ikraftsetjing, overgangsføresegner og endringar i andre lover

14.1 Gjeldande rett

Dagens lov har føresegner om ikraftsetjing som oppheva den tidlegare lova om statsbedrifter, ei overgangsføresegn som angir at statsbedrifter måtte vere omdanna til statsføretak innan eitt år etter at statsforetaksloven tok til å gjelde, og ei føresegn om endringar i andre lover.

14.2 Framlegget i høyringsnotatet

Departementet foreslo ei føresegn om at Kongen fastset når lova trer i kraft, at føresegnene kan tre i kraft til ulik tid, og at dagens statsforetakslov blir oppheva samtidig som ny lov trer i kraft. Også her foreslo departementet at Kongen kan oppheve dei enkelte føresegnene til ulik tid.

Vidare foreslo departementet ei overgangsføresegn som slår fast at dei statsføretaka som er oppretta i kraft av den eksisterande lova, blir vidareførte i den nye lova. Departementet foreslo det same for forskrifter som er gitt i medhold av statsforetaksloven, det vil seie forskrift 24. august 2017 nr. 1278 om de ansattes rett til representasjon i styre og bedriftsforsamling mv.

Departementet vurderte det slik at ei ny lov om statsføretak ikkje ville krevje endringar i andre lover, og såg ingen behov for å ha ei føresegn om endringar i andre lover.

Ingen av høyringsinstansane hadde innspel til føresegna om ikraftsetjing og overgangsføresegna.

14.3 Vurderingar frå departementet

Departementet vurderer at det ikkje vil vere nødvendig å oppheve dei enkelte føresegnene til ulik tid, og har derfor teke dette ut frå lovforslaget. Samtidig vurderer departementet at ein bør ha moglegheita til å fastsetje nærare overgangsføresegner i forskrift. Sjå framlegg til ny § 10-1 og § 10-2.

Departementet oppdaga i etterkant av høyringsrunden at ei ny lov om statsføretak vil likevel krevje endringar i andre lover. Dette gjelder lover som anten viser til statsforetaksloven i sin heilskap (vassfallrettigheitslova og skattelova) eller lover som viser til konkrete føresegner i statsforetaksloven (føretaksregisterlova og lov om Innovasjon Norge). Departementet har derfor utarbeida ei føresegn som endrar desse lovene slik at dei viser til ny statsføretakslov. Dette medfører ingen materielle endringar i desse lovene. Sjå framlegg til ny § 10-3.